ठोस प्रतिबद्धता नआएसम्म गठबन्धनले कांग्रेस–माओवादीलाई सहयोग नगर्ने

रातो घर, काठमाडौं – संयुक्त लोकतान्त्रिक मधेशी मोर्चासहितको संघीय गठबन्धनले काँग्रेस र नेकपा माओवादी केन्द्रले चित्त बुझ्दो प्रतिबद्धता नल्याएसम्म सरकार निर्माणमा सहयोग नगर्ने बताएको छ ।

नेकपा (एमाले) का अध्यक्ष केपी शर्मा ओली नेतृत्वको सरकार ढाल्नका लागि निशर्त सहयोग गरेपनि नयाँ सरकार बनाउनका लागि निशर्त सहयोग नगर्ने जनाएको हो ।

संघीय गठबन्धनको आज बसेको समिक्षा बैठकमा बोल्ने अधिकांश नेताहरुले प्रधानमन्त्रीका लागि हुने चुनावमा बिना प्रतिबद्धता मतदान गर्न नहुने तर्क राखेका थिए । तराई मधेश लोकतान्त्रिक पार्टीका उपाध्यक्ष वृषेशचन्द्र लालले ओली सरकार ढाल्नका लागि समर्थन दिँदा केही नबिग्रे पनि प्रधानमन्त्रीको चुनावमा त्यतिकै समर्थन गर्न नहुने धारणा राखेका छन् । चार लाइनको प्रतिबद्धता लेखेर मात्र समास्या समाधान हुँदैन, ठोस रुपमा प्रतिबद्धता आए मात्र प्रधानमन्त्री चुनावमा भाग लिने उनको सुझाव थियो ।

मधेशी मोर्चालगायत संघीय गठबन्धनले उठाउँदै आएको मागको बारेमा काँग्रेस र माओवादी केन्द्रको तर्फबाट ठोस प्रतिबद्धता नआएसम्म सरकार निर्माणमा सहयोग गर्न नहुने उनले तर्क राखेका थिए । प्रधानमन्त्री बनाएपनि सरकारमा जानुहुँदैन, उनले भनेका थिए, सरकार निर्माण भइसकेपछि हामीले राख्दै आएको माग सविधान संशोधन गरेर सम्बोधन गरे मात्र सरकारमा जाने बारे सोच्न सकिने त्यसअघि सरकारमा जाने बारेमा सोच्न पनि हुँदैन ।’

तराई मधेश सद्भावना पार्टीका वरिष्ठ नेता रामनरेश राय यादवले त प्रतिबद्धतामा समय निर्धारण पनि गर्नुपर्ने सुझाव दिए । यति दिनभित्र सविधान संशोधन गरेर मधेशको समस्या समाधान गर्ने कुरा काँग्रेस र माओवादी केन्द्रको प्रतिवद्धतापत्रमा नै उल्लेख गर्नुपर्ने धारणा राखेको बताइएको छ ।

सद्भावना पार्टीका महासचिव मनिष सुमनले सरकारमा जाने विषयमा मधेशी मोर्चा धेरै टाढा रहेको र यसको बारेमा कसैले कल्पना पनि नगरेको बताए । यद्यपी ओली सरकार ढाल्नलाई सहयोग गरे जस्तै सरकारमा निर्माणमा पनि सहयोग गर्ने उनले बताए । उनले भने, ‘तर सरकार निर्माणको सहयोग उधारो हुँदैन, त्यसका लागि ठोस प्रतिवद्धता आउनुपर्छ अनि मात्र सहयोग हुन्छ ।’

‘हाम्रो लागि ओली, देउवा, प्रचण्ड सबै उस्तै हुन् सबै नागराज हुन् । कुन बेला कसरी डस्छ थाह हुँदैन तर मधेशसँग ओलीले जसरी व्यवहार गरे त्यो असहय थियो, त्यसैले ओली सरकार ढल्दा मधेश खुशी छन्,’ उनले भने, ‘ओली सरकार ढाल्नका लागि नै काँग्रेस र माओवादी केन्द्रसँग सम्बन्ध भएको हो तर सरकार निर्माणका लागि त्यस्तो सम्बन्ध रहने छैन ।’

बैठकमा नेताहरुले गठबन्धनले गरेको ३९ दिने रिले अनसन सफल भएको निष्कर्ष निकालेको राष्ट्रिय मधेश समाजवादी पार्टीका नेता केशव झाले बताए । मधेशमा आन्दोलन हुँदा सम्प्रदायिक आन्दोलन भयो भनि आरोप लागेको थियो तर यो रिले अनसनले मधेशलाई राष्ट्रिय आन्दोलनसँग जोडेको धारणा नेताहरुले राखेको नेता झाले बताए । तमलोपाका उपाध्यक्ष बृखेस चन्द्र लालले गठबन्धनको आन्दोलन जिल्ला जिल्लामा पनि विस्तार गर्नुपर्ने प्रस्ताव राखेका थिए ।

Labels: Breaking, National, Politics, Samaj